نام يا مصري مصر مش عايزة تناديك
ياللي فقر الدنيا أصبح لك شريك
ياللي كان داءك وفاءك والكرامة وكبرياءك
الحشيش والبانجو ساقك. كبرياءك مات خلاص والبركة فيك
نام يا مصري مصر مش عايزة تناديك
ياللي دايما كنت رافع بالسلاح ايديك لفوق
بالبنادق والمدافع خليت العالم يفوق
النهاردة سهل جدا تحكمك حتة حشيش
الشيوخ فوق مالطة تدن والشباب مبيختشيش
رقصة بلدي ورقصة تانجو
مرة خمره ومرة بانجو
والي م الدوامة ينجو يربي دقنه ويعاديك
نام يا مصري مصر مش عايزة تناديك
فصلوا دستور مقاسهم يلبسوه بس الكبار
وانت تحت نعال مداسهم قلت آه زي الحمار
قلت آه ولا حد همك مين يدوس فوق وش مين
هما يقروا الفاتحة وانت كل حرف تقول آمين
انت عارف بس صامت
حتى بطنك لما صامت
كان حزامك فوقها قامط للزراير يشتكيك
نام يا مصري مصر مش عايزة تناديك
مين بيفهم في السياسة ؟ لا الأفندي ولا المدام
المهم الماتش امتى ؟ والنتيجة كام لكام؟
والعشا فين النهاردة وفي المسلسل عملوا ايه
ولعيب الكورة الفلاني ساب ناديه في الدوري ليه ؟
كله بيهلوس وهايص
وانت يا ابن المصري لايص
جوه مسرح العرايس
والخيوط رابطة في ايديك
نام يا مصري مصر مش عايزة تناديك
كنت لما تقول معارض ألف واحد كان يخاف
بعت صوتك في المعارض واستغطيت باللحاف
قول نعم . حط العلامة . واوعى تقرا في يوم كتاب
هما عايزينك نعامة دافنه راسها في التراب
والطاووس جنبك يخطي
بصمجي . ويقول دا خطي
وانت لما رضيت توطي
شوف بقى اللي ح يجرا فيك
نام يا مصري مصر مش عايزة تناديك
ياللي عايشين ع الحضارة وكام هرم على معبدين
يا ابني دول حبة حجارة انت فين والناس دي فين
انت جدك يعني خوفو ولا خالك اخناتون
ده انت مبتعرفش تعمل حته سوستة بنطلون
روح ل(يني) املا الازازة والحياة آخر لزازة
ده انت يابني مالكش عازة زي فرخة ناقصها ديك
نام يا مصري مصر مش عايزة تناديك
ويقولولك مصر اكتر حد راعي للسلام
واحنا زي حمار في كارو عربجيها العم سام
اللي بيفكر يخالفه أو يقولوا حتى ليه ؟
تبقى ليلة أمه كحلي والمعونة تضيع يا بيه
امشي تحت أوامره بس مره (شي ) أو مرة (هس)
و وان طلعلك مرة حس يبدأ التفتيش عليك
نام يا مصري مصر مش عايزة تناديك
شفت واحد مرة قاللي يا بني ما تبطل عويل
انت ناسي نجيب بتاعنا والنوبل واحمد زويل
قلتله الأول أخدها بقصة ساء فيها لديانته
وعمك احمد ايه عملك لما جاب للثانية فمتو
والنبي اتخيب بخيبتك ياللي مش عارف نصيبتك
دا انت من صغرك لشيبتك لقمتك دي خسارة فيك
نام يا مصري مصر مش عايزة تناديك
والنبي انا بكتب قصيدتي ودمعة نازلة من عيوني
أصلي مصري وكل خيبتي إني اهلي علموني
إني لو شفت الحقيقة في مرة و اسكت أبقى شوشو
وان قدرك لو يجيلك قوللي مين عنك يحوشو
ياللي مستغرب لحالي قوللي بالله يا ابن خالي
لما سيد يبقى سالي طب منين الخير يجيك
نام يا مصري مصر مش عايزة تناديك
