الفوضى ومن يقودها

لاشك ان القوى السياسية تعمل فى مصر بشكل فوضاوى وتخريبى بطريقة منظمة ومرتبة ويحاولون بكل الطرق فرض سيطرتهم على الساحة السياسية فى مصر،مستخدمين بذلك سلاح الاستفزاز تجاه الداخلية والقوات المسلحة للدخول فى تلك المصادمات ليظهر وكأن الشرطة هى من تقتل وتظلم وتستخدم العنف تجاه المتظاهرين مدعين السلمية فى تظاهرته على الرغم من اصرارهم على اقتحام مبنى وزارة الدخلية باى وسيلة اضافة الى اقتحام مديريات الامن بالاسكندرية والاسماعيلية والسويس والتعدى على قسم شرطة الاربعين بالسويس ومبنى الحى ايضا ، وللاسف هناك من يبرر مواقفهم هذة عبر وسائل الاعلام خلف ستار الشهداء وحق الشهداء ودم الشهداء ليظهروا امام الراى العام صورة الضحية المسكينة التى تتعرض للقسوة والعنف.
كل هذا طمعا فى دور البطولة ودور الثورة الذى يحلمون به كطريق ممهد للزعامة حتى ولو كان ذلك على حساب الشعب وعلى حساب الاقتصاد الذى اصبح مجهول المصير وعلى حساب امن مصر.
ولا ادرى لماذا كل الغضب الذى ينتابهم عند القول بوجود اطراف واجندات خارجية تعبث بالشان الداخلى المصرى مع ان هذا القول قد ينفى عنهم تهمة التخريب ولكن من الواضح انهم يقودون البلاد بهذا الاسلوب الى حرب اهلية والى طريق طويل من الفوضى والتخريب بعيدا عن الاستقرار وبعيدا عن عودة الحياة الطبيعية للبلاد
وللاسف بعض الشباب المتحمس ينساق وراءهم دون تفكير، فهل مجرد وقوع مناوشات بين الامن ومتظاهرين يجرى الكثير لنصرة المتظاهرين دون تفكير او دون معرفة تفاصيل الاحداث منساقين وراء اشاعات مضللة تعمل على تحفيزهم ضد الامن وضد الدولة.
على الجميع ان يحكم العقل فى جميع التصرفات وان يبعد عن التحفز الزائد وان يغلب الجميع المصلحة العليا ومصلحة البلد على المصلحة الشخصية وعلى العناد الذى يركب العقول ويقود الى العديد من السلبيات فى مجتمعتنا واهم تلك السلبيات العنف وسفك الدماء

انا ملاحظه كدا يا على فى كل التوبكات اللى انت بتعملها انك بجد ضد الثوره قلبا وقالبا بس احب اقولك حاجه واحده ان اللى انت بتتريأ عليهم دول هما فعلا شهداء وفعلا ماتوا من اجل قضيه ومبدأ بس انت عارف هما ماتوا ليه عشان انت تعيش عشان بكره لما تتخرج بدل ما تقعد عاطل وتلف هنا وهنا تلاقى شغل وتلاقى سكن وتلاقى اكل وتلاقى حياه كريمه محترمه عشان لما تسافر بره تبقا رافع راسك لفوق وانت بتقول انا مصرى ومحدش يقدر يهينك عشان تقدر تعبر عن رايك وتاخد حريتك وعشااااااااااااااااااااااااااااااااااااااااان غيره كتير للاسف بجد انا مكنتش اعرف ان لسه فيه ناس ضد الثوره مع احترامى ليك يا على فأنا باختلف معاك تمام وكفايه كدا عشان انت زعلتنى اووووووووووووووى بجد

السلام عليكم ورحمه الله وبركاته
تحياتى ليك يا على على التوبيك الجميل دا وبجد كل مواضيعك كويسه جدا وبتشد وبحب اقراها فانا هعقب على كلامك ويارب اقدر افيد او ردى يكون له فايده
انا من وجهة نظرى المتواضعه ان كان لازم يحصل اللى بيحصل دا كان لازم يكون وقفه كمان ف التحرير علشان ثورة 25 يناير كانت بتتسرق مننا ودا كان واضح اوى من بعد الثورة ايه اللى حصل ؟؟؟؟

تيجى نشوف
اولا نتكلم عن المشير او المجلس العسكرى وهو طبعا القائد الاعلى
الراجل دا فى شهادته زى ماعرفنا انه شهد شهادة زور كل اجابات كانت مشفتش معرفتش واحنا شفنا اكتر من 850 شهيد واكتر من 5 الاف مصاب ومعاق دا بالنسبه للمجلس العسكرى اللى احنا المفروض نحترمه زور ف زور
نيجى بقى ل بعد الثورة بعد 10 شهور
1- قانون الطوارئ موجود واتفعل
2- امن الدوله اللى ذل البلد وهانها وعيشها ف عذاب ومرار اترقى وبقى امن وطن
3- الشرطه علوا مرتباتها ومكفاءات وخلافها (فين الشرطه )
4- المحاكم العسكريه زى ماهى وبيحاكموا الناس
5- معبر رفح متفتحش لسه مقفول
6- فك الحصار عن اخوانا ف غزه (لسه متفكش )
7- كل القيادات اللى كانت موجوده لسه موجوده
8- نقل الحكم ف يونيو لمدنى بدل عسكرى فين النقل اللى حصل وبعدين هو يونيو لسه مجاش
دا بالاضافه للى حصل على الحدود من قتل جنودنا واستشهادهم ولحد انهادره فين حقهم ؟؟؟

ف الناس اللى ف التحرير دى كلها واقفه عايزه ثورتها عايزه حقها 10 شهور عدت مفيش جديد دا بالعكس الثورة بتتنهب فكان لازم تطلع تاخد ثورتك اللى اتسرقت

دا بالنسبه للى طلعوا علشان ياخدوا حقكم واللى هم متواجدين فى ميدان التحرير
بالنسبه للى انت بتتكلم عليه اقتحام الاقسام وخلافه
ف اسكندريه اللى سلم المقتحمين دول للشرطه كانوا الثوار معنى كدا ان دول اصلا مش من الثوار وان دول بلطجيه او خارجين عن القانون او مدسوسين زى ما تحب تسمى سمى
بالنسبه لشارع محمد محمود علشان بس نكون ف الصورة الشارع دا يبعد عن مبنى الداخليه ب700 متر تقريبا يعنى مش زى ما انت فاهم ان الناس دى خطوتين وتكون واقفه ف الوزاره ودا احد 5 شوارع بتادى للميدان
وعلشان تكون فاهم وعارف على حسب الروايات ان الشرطه ضربت الاول او ان الثوار ضربوا الاول محدش قادر يحدد بالظبط بس لو بتفكر صح شوف كام واحد
مات وانا عندى فيديوهات لو شفتها هتغير رايك بنسبه 180 درجه اما بالنسبه لاحزاب السياسيه اللى عايزه تركب الموجه وتدعى انها اللى عملت الثوره علشان تقوم بدور البطوله فدا مع اللى بيحصل دا ان شاء الله هتبان على حقيقتها ولو انى شايف ان مش احزاب بس لا دا المجلس العسكرى نفسه مفكر انه هو اللى عمل الثورة
على فكره انا كنت ضد ثورة 25 يناير بس فهمت وعرفت ان انا كنت غلط
عامتا يا شباب اسف لو طولت عليكم
بس زى ما دايما احب اقول الاختلاف ف الراى لا يفسد للود قضيه وعبر زى ما انت عايز انت حر ف رايك بس لو سمحتم بدون تجريح مع الالتزام بالاخلاق العامه

اسف على الاطاله

عندك حق يابركه فى كل الكلام اللى قلته

انا متفق مع كلامك يابركة وده من رأيى أيضا وانت جبت الخلاصة والتفصيل أيضا لذلك مقدرش اقول اى كلام بعد كلامك .