انت مصاحب مين ؟؟؟

السلام عليكم ورحمة الله وبركاته

اتمنى تكونو بخير دايما شباب وبنات ان شاء الله

النهاردة حبيت موضوعى يكون متعلق شوية بينا وبأصحابنا

التوبيك النهاردة بعنوان

هعرفك لما اعرف انت مصاحب مين ؟؟؟

كلنا عارفين ان الانسان بطبيعته مخلوق اجتماعى

بيتاثر وبيأثر فى اللى حواليه

ميعرفش خالص يعيش لوحده ممكن يجيله فيها اكتئاب هو كده خلقة ربنا

اكتر عقاب ممكن تعاقب به شخص انه يبقى فى حبس انفرادى

الانسان عشان مخلوق اجتماعى دايما هيكون محتاج لصديق (( صاحب )) يشكيله ويفضفضله

احنا طول ما احنا فى الدنيا وفى تعاملاتنا كلنا لابسين ماسكات

مخبية حقيقتنا مش بقولك كده عشان انت وحش

تؤتؤتؤ انت بتعمل دا عشان الناس يتعاملو معاك ومضطر

عشان تتعامل مع الناس كده هى دى طبيعة الحياة والمعاملات اليومية

بس فى حد انت بجد بتبقى محتاج ساعتها معاه انك تشيل الماسك دا وتبقى بطبيعتك كده

الصديق هو الشخص اللى انت معاه من غير ماسكات

ضامن انه يفهمك ضامن لما تشكيله يحتويك

وبتخرج معاه وتسافر معاه وانت مبسوووط بجد سعادة جامدة جدااا

انت محتاج تقلع الماسك دا وتحكى اللى جواك من غير ماتكون خايف ان حد يفهمك غلط

ها فكر كده مين معاك كده ؟؟؟ فلان ولا فلان ولا فلان

بجد ده هيديك احساس حلو اوى بالسعادة [ندعوك للتسجيل في المنتدى أو التعريف بنفسك لمعاينة هذه الصورة]

الامام الشافعى قال : (( احب اخوانى الى قلبى من اكون معه كما اكون وحدى , واثقل اخوانى على قلبى من يتجمل لى واتجمل له ويتكلف لى واتكلف له ))

ياترى عندك صديق بالمواصفات دى ؟؟

طيب نفترض ان فى حد كده عندك

تعالى هنا كده انت ضامنه ؟؟؟

ضامن انه يحفظ سرك ضامن انه مراعى مصلحتك ؟؟؟

مش بكلمك على اصحابك اللى قابلتهم فى الكلية او المدرسة او .... او .... او .... صاحب بالصدفة دا

لا مش دا اللى قصدى عليه

الناس دى بتتقسم نوعين

ناس معندهمش اصدقاء حزانا كده مع نفسهم

وناس تانية ييجى يقولك دا انا عندى ع الفيس 347 صديق

طيب دورلى فيهم كده على حد انت ادامه من غير ماسك وكمان ضامنه هااااااا لقيت فيهم حد ؟؟؟؟

صديق يكون فى نفس مستواك الاجتماعى نفس طريقة تفكيرك حد هيبقى فى نفس الليفل من التفكير

خلاص لقيته .... طيب تمااام اوى

لسه بقى فى مشكلة كمان ... اها واكبر مشكلة كمان

هو ممكن يضيعك هو فاسد

ازاى يعنى ده صاحبى وينفع يكون صديقى وفاهمنى وبيخرج معايا وأمين ؟؟

هقولك بس فاسد !!!

ممكن يدمرلك حياتك يبقى كأنك طلعت من نؤرة عشان تقع فى ضحضيرة

يعنى بتدور ناووو على صاحب صالح مؤتمن وانت معاه تبقى من غير ماسكات

لو لقيت التلاتة دول يبقى بجد يابختك وربنا يباركلك فيه

ممكن حد ييجى يقولى انا لقيت حد فاهمنى وكمان أمين بس هو مش صالح عادى يعنى هتعدى [ندعوك للتسجيل في المنتدى أو التعريف بنفسك لمعاينة هذه الصورة]

اقولك انسى دول بيأثروا فيك ده انت ممكن تبقى فى النادى وواقف مع شلتك وانا معرفكش

من منظرهم اقولك انت عامل ازاى وناجح ولا فاشل وعلاقتك بربنا وبأهلك عاملة ازاى

هتلاقى منهم اللى بيتريق على اهله

والتانى اللى قابل يتشتم بابوه وامه

واللى ييجى يقولك ايه دا انت لما بتشوف باباك بيقف ده انا بابايا لما بيدخل بفضل نايم ولا بعبره [ندعوك للتسجيل في المنتدى أو التعريف بنفسك لمعاينة هذه الصورة]

ياعم ده دقة قديمة ده راجل تفكيره متخلف [ندعوك للتسجيل في المنتدى أو التعريف بنفسك لمعاينة هذه الصورة]

ده لدرجة ممكن تدخل ع الفيس تشوف صور ومناظر اصحابه تعرف ساعتها هو مين دا واخلاقه عاملة ازاى

هاااااااا لسه برضه مش مقتنعين ؟؟؟

ماتقوليش مستحيل تلاقى حد كده بالمواصفات دى

وربنا هتلاقى موجودين ده الصاحب الصالح دا رزق من ربنا

طيب اقولك ع حاجة هات موبايلك كده وقلب فيه وشوف مين من اصحابك

ينفع يكون صاحب صالح ممكن قريبك او جارك او اخوك او اختك وياسلام لو ابوك او امك

هاااااااا لقيت ولا مالقيتش برضه ..... ركز وانت هتلاقيه جنبك دور عليه

اوعى تروح تدور على اى صاحب ويروح مضيعك خصوصا الشباب اللى فى سننا بتوع الجامعة

اللى محتاج اى شلة ينضملها وخلاص [ندعوك للتسجيل في المنتدى أو التعريف بنفسك لمعاينة هذه الصورة]

مع الوقت بيبقى دا ضغط عليه بيعمل اللى هما بيعملوه

عشان بس يفضل معاهم ومايطردهوش من الشلة

لاء سيبهم سيبهم سيبهم ربنا هيكرمك والله

ده انت مجرد انك تبعد عنهم ده كرم من ربنا

ده مسافة شهرين من معرفتهم هتتطبع بطباعهم

اوعى الشيطان يضحك عليك ويقولك خليك معاهم وخليك زى ما انت برضه

صدقنى غلط غصب عنك هتندمج وياهم وهتعمل اللى بيعملوه وتبقى واحد منهم
ده ممكن يضيعك دنيا واخرة

ربنا سبحانه وتعالى بيقول : (( قل يا عبادى الذين اسرفوا على انفسهم لا تقنطوا من رحمة الله ان الله يغفر الذنوب جميعا ))

فى واحد كان عاوز يبقى كويس وصاحبه ضيعه

وفى واحد كان عاوز يضيع وصاحبه انقذه

قولى مين صاحبك اقولك انت مين وربنا راضى عنك ولا لاء ؟؟؟

لو عندك صاحب سىء سيبه هتقولى ماليش غيره هقولك سيبه سيبه

وقول يارب انا سيبته عشان تبعتلى الاحسن منه

اعمل جرد لاصحابك ومعارفك مين فيهم يبقى صاحب صالح

هتلاقى فيهم الطيب والامين والصالح كلمه وقوله تيجى نحول علاقتنا لصداقة

أسعاله عشان هى دى اللى هتسعدك

يعنى لو عندك واحدة صاحبتك روحيلها وقوليلها احنا اوك اصحاب بس ايه رايك نغير علاقتنا وتبقى لله

يعنى تعينينى على طاعة ربنا وعلى تصليح حياتى وانا كمان

وياسلاااااااام على دى سعادة وده ثواب

النبى ( ص ) بيقول : (( ينصب حول العرش يوم القيامة منابر من نور عليها قوم لباسهم نور ووجوههم نور ليسوا بأنبياء ولا شهداء يغبطهم الانبياء والشهداء ))

فقلنا (الصحابه رضوان الله عليهم) : صفهم لنا يا رسول الله

فقال صلى الله عليه وسلم : ( المتحابون في الله ))

فى ناس مش قادرة تسيب اصحابها ومهما اقولها خصوصا البنات برضه مش هسيب اصحابى [ندعوك للتسجيل في المنتدى أو التعريف بنفسك لمعاينة هذه الصورة]

مهما تقولى وتعملى مش هسيبهم

اوك يا بنتى خلاص خليهم بس ع الاقل الانتيم بتاعتك تبقى بالمواصفات اللى قولتها

اظن كده عدل يعنى

اللى هيحبوا بعض فى الدنيا ربنا ان شاء الله هيجمعهم فى الجنة

ادعى ربنا واجرد اصحابك كلم صاحبك وكلمى صاحبتك

هاااا موافق نحول صداقتنا انها تبقى بالشكل دا ؟؟؟

سيب الصدف دى اللى عرفتكم عليهم واختار انت مرة بقى بنفسك [ندعوك للتسجيل في المنتدى أو التعريف بنفسك لمعاينة هذه الصورة]

اتمنى تكونو يا جماعة فهمتوا قصدى

ومنتظرة مناقشاتكم وربنا يكرمكم يارب بالصحبة الصالحة

وربنا يسعدكم فى الدنيا

موضوع اكثر من رائع بجد تسلم ايدك

موضوع جميييييييييييييل جداااااااااااا

تسلم ايدك

شكرا لمرورك يانونو انتى وحماده نورتو التوبيك واسعدت بمروركم

جميل الموضوع ومهم جداااااااااااااااااااااااااااااااا
لان مش دايما الصديق بيظهر بطبعتو
بعضهم بيظهر بمسك وانا مش بحب النوعيه دى خالص
تسلم ميشو على الموضوع

شكرا لمرورك ياملاك ومنورة التوبيك ودايما منورة مواضيعى

تسلم ميشو ده من زوقك
تسلم ربنا يخليك

موضوع اكثر من رائع

تسلمم ايدك على التميز

منور ياهيما المنتدى وشكرا لمرورك ياكبير

تسلم ايدك ياميشو موضوع جميل ويارب يرزقنا جميعا بالصحبة الصالحة

samoraaa كتب:: تسلم ايدك ياميشو موضوع جميل ويارب يرزقنا جميعا بالصحبة الصالحة

شكرا لمرورك ومنورة التوبيك

وربنا يرزقنا الصحة جميعا اللهم اميييييييين